يوم المنى .. يوم ما .....

احبابى انا بجد شعورى النهاردة فوق الوصف .. ونفسى يوصل لكل احبابى اللى هيقروا كلامى .. ونفسى يوصل لكل الناس ..

ايه رأيك لو انت غلطت فى حق حد ونفسك تصالحه بس خايف انه ميقبلش اعتذارك ؟؟

وانت عمال تقول بينك وبين نفسك انه عمره ما هيسامحنى عشان انا غلطت فى حقه اوى !!!

وايه رأيك برضه لو جيت فى يوم لقيته بيجيبلك هديه .. هتبقى مكسوف من نفسك قد ايه ؟؟

هو ده بالظبط يا جماعة حالنا مع ربنا النهاردة _ولله المثل الاعلى_

ياما غلطنا فى حقه .. ياما عصيناه بنعمته .. وياما سترنا واحنا اللى كنا بنفضح نفسنا ونتباهى بمعصيته ..صح؟؟ مش ده حالنا كلنا؟؟

ايه رأيك بعد كل ده .. المولى تبارك وتعالى يعطيك هدايا لا تتخيلها .. مش هدية واحدة.. ايه هى؟؟

(1)قال صلى الله عليه وسلم (صيام يوم عرفة يكفر سنة ماضية وسنة باقية)

ايه ده يعنى انا لوصمت اليوم ده ربنا يغفرلى السنة اللى فاتت واللى جاية .. ايوة ..

ازااااااااااااى؟؟

لان ربك بيحبك .. وحابب يغفر لك ويتوب عليك ..لانه قال ( ويريد الله ان يتوب عليكم ويريد الذين يتبعون الشهوات ان تميلوا ميلا عظيما)

وقال برضه (قل ياعبادى الذين اسرفوا على انفسهم لاتقنطوا من رحمة الله ان الله يغفر الذنوب جميعاانه هو الغفور الرحيم)

ده يوم المنى يوم ما ربنا يرضى عنى ويغفرلى 

(2) استجابة الدعاء (خير الدعاء دعاء يوم عرفة)

شوف بقى انت نفسك فى ايه .. والله هيحققهولك ..انا بأقسم لانى متأكد من كده .. لانه هو اللى قال (اجيب دعوة الداعى اذا دعان ) .. وانا مصدق ربنا 

بس بالله عليك|ى افتكرونا بدعائكم .. افتكروا بلدكم فى دعائكم .. افتكروا امتكم فى دعائكم .. افتكروا المسجد الاقصى .. افتكروا امالكم واحلامكم الشخصية ..

(3) عتق الرقاب (ان الله يعتق فى يوم عرفة كمن اعتقهم فى العام كله)

كل ده ومش نفسك ربنا يغفرلك .. بالله عليكم يا جماعة .. افتكروا النبى صلى الله عليه وسلم فى يوم عرفة .. وهو يقول فى حجة الوداع ( ايها الناس انى مباهى بكم الامم (هفتخر بيكم) يوم القيامة فلا تسودوا وجهى)

بالله عليكم .. استحلفكم بالله .. لاتسودوا وجه رسول الله ..

(الــــوصــــفــــــة الســــــحـــــــــريــــــــة لاخذ هدايا يوم عرفة)

التذلل بين يدى الله .. استشعر انك فقير من غيره .. استشعر انك ذليل من غيره .. استشعر انك ضعيف من غيره .. وقول لربك كده فى دعائك .. (يااااااااارب انا مسكين اوى .. يارب انا ذليل اوى .. يارب انا من غيرك اضيع ..)

لازم تحس المعانى دى .. لان هو الملك .. استشعر انك ضعييييييييف اوى ومسكين اوى وذليل اوى للـــــــــــه

ارجوكم يا جماعة مش عاوزين نضيع ثانية فى اليوم ده .. وارجوكم وصلوا كلامى ده لكل الناس اللى عندكم ..

مبروووووووووووووك عليكم رضا ربنا ومغفرته .. هذا يوم قال الله فيه ( اليوم اكملت لكم دينكم واتممت عليكم نعمتى ورضيت لكم الاسلام دينا)

كل عام وانتم الى الله اقرب .. وعلى طاعته ادوم وعن معصيته ابعد ..

يااااااارب يجمعنى بيكم فى الدنيا .. فى صلاة عيد المسجد الاقصى ..

ويجمعنى معاكم فى الاخرة .. على حوض النبى صلى الله عليه وسلم ..

بقلم

محمد مصطفى